Pro 17 | WSK | STEP | Kariimet saki inang ningo ningo suen biya ago, bare nunga na na gia te ining singi nirung ago. Se ni ka inang mamis memek katirta agi, bare ni ka imet kuriang ago nengemang suwanta nasan, mu ni nunga kiarem.

Proverbs 17

Saki alo arungu te yawarakala bagerko

1 Kariimet saki inang ningo ningo suen biya ago,
bare nunga na na gia te ining singi nirung ago.
Se ni ka inang mamis memek katirta agi,
bare ni ka imet kuriang ago nengemang suwanta nasan, mu ni nunga kiarem.
2 Ura kari ko ikia ningo nuam, mu ko kari biya baluk se ko namar nunguning ikia memek te aolak iluso mu bituokko.
Se tom ko kari biya umu kueruk, mu ura kari mu ko namar nunguning bo iwita agotala ko melmasak sang giokko.
3 Gold se silver nunga ikia ko mu, tama te kaisan asele ninguru arigisan ko ikisan.
Bare anananga nangamang motam mu KARI BIYA kota ira arigiso.
4 Kariimet memek mu ikia memek ikimonko ninguru nodogowa tagisan.
Uwutatala, kawel kariimet mu den kawel ikimonko ninguru kuesan.
5 Kaem kariimet suen la nunga beteram. Se awiriya kariimet kituwura guat nunga bita maguwuso ale nunga gusirso,
mu nu Kaem agotala gusirso.
Se awiriya kariimet sang ikup arigisan se nu ko amilmiloso, mu nu koma ikup toko.

6 Kariimet garuk mu nunga nunumas ari nunga ninguru amilmilasan.
Iwitatala, kuriang nunga nunam nonet nunga ninguru amilmilasan tala.

7 Kari ikia ningo bo nukote mena bare numi patawoso, mu kariimet nomotam te mu nu me terong.
Bare kari supuling wore den kawel balso, mu me terong nunguningkiri!
8 Kariimet saki ikisan manga tetela la kari bibiya nunga nungarsan mu sangam yawara te tamonko iwita ko ikisan.
9 Kari bo kimik te memek bitiruk, mu ni siwu tui ale me ko baluko.
Umutang te ni ninimi nengemang tua ko munan sail tusam.
Bare ni memek umutang ko kamin tugu se tom suen biya ko balu lager,
mu ni ninimi nengemang suwanta bagara ko munan mu batagukko. ^{▼▼Pro 17:9 Bo ko ikup kutuwura ko munan: Mat 18:21, 35; Mark 11:25; Col 3:13.}
10 Kari bo ko ikia ningo ago, mu kari bo nu due iluwa ko den manarso mu nu tom suwanta umutang te la giris palagoso.
Bare kari ikia ningo nukote mena, mu ni tom 100 iwita moar, bare nu me ta giris palagukko!

11 Kari memek mu supuling lagoso se kilek memek beteso ale daong kager ngual ngual karogo naguso aratoso.
Bare nuna kari bo gomang tua ko munan nukote mena mu betemon se kote tairuk ale ninguru nunguningkiri yaman tuokko.
12 Bear ko gotek tere gisan mu nu ninguru gomang magoso.
Se ni koma te aratu mu memek, kerak kagerurukko.
Bare kari ikia memek ago mu ngualara ko kilek memek bitawuruk se ni nama arik,
umutang mu memek nunguningkiri!
13 Saki alo kilek ningo la kimik te betemon,
se ni aking kilek memek nungumik te bita lager,
mu nika kawam te kilek memek ninguru anirukko.
14 Kari bo gomang magara ko den duap beteso,
mu nu yu bo kapawaram se koma kaloman se peleram baga,
aking mutim gotek beteram ale te aratam kaposo iwitata.
Se tairatela mutim gotek mu bagumon,
mu asele mutim mu me woseluruk se yu biyala me aratukko.
Mu turantala, ni tairatela den ningo te gomang magara ko den mu koma kalo se ining singi biyala me aratukko.
15 Kari kumik den mena wore yam yaman tua,
se aking kari memek beteram wore yam ipi betera se namara,
mu kilek ilagala umutang KARI BIYA me ta ko kueso nunguningkiri.
16 Ni manga kari ngualara kuting te betesam mu awuk ta nu sanguk se ikia taukko? Mena.
Mu awuk, nu ikia taukko gomang me aniso.

17 Nika singsang yawara nunguningkiri mu tom suen biya te nika kuesan. ^{▼▼Pro 17:17 Singsang yawara: Pro 17:9,17; 18:24; 25:18; 26:18-19; 27:6,10.}
Uwutatala, ka launuria mu ikup te nika sangarmonko pingita sinar ago bagasan.
18 Kariimet saki balsan kari bo ko ikup mu nuna am kutuwumonko balsan,
bare kariimet umutang ikia mena.
19 Awiriya ining munak den tagira gurugumura ko kueso,
mu nu kilek memek bitirukko kueso.
Awiriya kuring papak maso ale numi patawu lagoso,
mu nu kota memek kupuso.
20 Nangamang motam diram mena mu ana me sokel ago sanamanakko.
Kawel nanga nangamili te aratu laguruk mu ikup ningi nanga bitirukko.
21 Kari bo ko kuriang ikia ningo kote mena,
mu nu ko nuet mu amilmil bo kote mena, gomang ikup biya.
22 Gemang amilmil ago bager mu marasin iwita, ka kimik sail tuok se yawarakala bagerko.
Bare gemang ikup ago bager, mu kuera iwita kimik guang yaman tuokko.

23 Kari memek alo mu manga tetela la nuguting te betesan se to gilingisan,
ale nunga munan umutang te munan diram te den ariga ko wore te sokel menawusan.
24 Kari ko ikia ningo nuam, mu nu ikia suwanta umutang te la ura beteso ale namoso taiso.
Bare kari ikia ningo nukote mena, mu nu lage ngual ngual te namoso taiso.
25 Kuriang bo ikia memek karo tui lagoso,
mu noko nuamnuet nongomang ikup biya lagasan.
26 Kariimet nungumik te memek bo mena,
bare am ikup nungarsan, mu munan mu me terong.
Se betelatala kariimet ningo kilek diram la beteman bare nunga lilumasan mu me terong tala.
27 Kari ikia ningo ago, mu nu den ngual ngual me munakoso,
ale tairatela me gomang magoso.
Se kari bo ikia memek ngualara agotala, bare me munakoso, kuring kaloso ale bagoso,
mu kariimet ikisan kari ikia ago ko iwita balsan!
28